مش بفلوسه

..
ﺑﻨﺎﺩﻡ ﺑﺼﻴﺘﻪ ﻭﻫﻤﺘﻪ ﻭﻧﺎﻣﻮﺳﻪ ...
ﻗﻴﻤﺔ ﺍﻟﺮﺍﺟﻞ ﻗﺪﺭ ﻣﺶ ﺑﻔﻠﻮﺳﻪ
ﻣﺎﻫﻲ ﺑﻤﺎﻟـــــــــــــﻪ ...
ﻭﻻﻫﻲ ﺑﻜﺜﺮ ﻣﺸﺎﻏﻠﻪ ﻭﺃﻋﻤﺎﻟـــــﻪ ...
ﻭﻣﺎ ﻫﻲ ﺑﺮﺯﻗﻪ ﻭﻟﺒﺴﺘﻪ ﻭﺍﻳﻜﺎﻟﻪ ...
ﻋﺰﻳﺰ ﻧﻔﺲ ﻟﻮ ﻳﺎﻛﻞ ﻓﺘﺎﺕ ﻭﻟﻮﺳـــﻪ
ﻣﺎﻫﻲ ﺍﺭﻗـــــــــــــﺎﻡ ...
ﻭﻻ ﻫﻲ ﻣﻨﺎﺻﺐ ﻋﺎﻟﻴﺔ ﻻ ﺃﺧﺘـــﺎﻡ
ﻗﻴﻤﺔ ﺍﻟﺮﺍﺟﻞ ﺷﺮﻑ ﻭﺍﺣﺘﺮﺍﻡ ...
ﻋﺼﺮﺍﻥ ﻣﺎ ﻳﺮﺿﺎﺵ ﺣﺪ ﻳﺪﻭﺳـــﻪ ...
ﻛﺮﻳﻢ ﻃﺒﻊ ﻋﻮﻓﻲ ﺷﻬﻢ ﻣﺎ ﻳﻨﻀﺎﻡ ...
ﻣﺎ ﻋﻨﺪﻩ ﻧﻮﺍﻳﺎ ﺧﺎﻳﺒﺔ ﻣﺪﺳﻮﺳـــﺔ
ﻣﺶ ﺑﺎﻟﻌﻤﻠـــــــــــــــــــﺔ ...
ﻭﻻ ﻫﻲ ﺑﺘﺠﺮﺓ ﻓﻲ ﺃﺳﻮﺍﻕ ﺍﻟﺠﻤﻠــﺔ
ﻗﻴﻤﺔ ﺑﻨﺎﺩﻡ ﻭﻳﻦ ﻳﺬﻛﺮ ﻛﻠﻤﺔ ...
ﻓﻲ ﻣﻴﻌﺎﺩ ﺗﺒﺪﺃ ﺛﺎﺑﺘﺔ ﻭﻣﺪﺭﻭﺳــــﺔ
ﻣﺎ ﻫﻲ ﺑﺠﻴﺒــــــــــــــــــﻪ ...
ﻭﻻ ﺑﺴﻜﻴﺪﺓ ﻣﻌﺒﻴﺔ ﻻ ﺣﻘﻴﺒـــــــــــــﺔ ...
ﻗﻴﻤﺔ ﺑﻨﺎﺩﻡ ﻓﻲ ﺍﻟﻮﻓﺎﺀ ﻭﺍﻟﻄﻴﺒﺔ ...
ﺧﺼﺎﺋﻞ ﺍﻟﺨﻴﺮ ﻓﻲ ﺩﺍﺧﻠﻪ ﻣﻐﺮﻭﺳــﺔ ...
ﻣﻊ ﺍﻟﻨﺎﺱ ﻣﺎﻳﺪﻳﺮﺵ ﺯﻋﻞ ﻻ ﺭﻳﺒﺔ ...
ﻭﺩﻭﻡ ﺭﺍﻳﺘﻪ ﻓﻲ ﺍﻟﻌﻠﻮ ﻣﺶ ﻣﻨﻜﻮﺳـﺔ
ﻣﺎ ﻫﻲ ﺑﻄـــــــــــــــــﻮﻝ ...
ﻭﻻ ﻫﻲ ﺑﻔﺨﺎﻣﺔ ﻻ ﺳﻤﺎﺣــﺔ ﺯﻭﻝ ...
ﻗﻴﻤﺔ ﺑﻨﺎﺩﻡ ﻳﺘﺒﻊ ﺍﻻﺻـﻮﻝ ...
ﻳﺠﻨﻲ ﻧﺘﺎﺋﺞ ﻣﺜﻤﺮﺓ ﻣﻠﻤﻮﺳــــﺔ ...
ﻭﺧﻠﻚ ﻣﻦ ﺍﻟﻠﻲ ﻓﻲ ﺍﻟﺠﻬﺎﻟﺔ ﻳﺼﻮﻝ ..
ﺧﻠﻴﻪ ﺑﻴﻨﻪ ﻏﺎﺭﻕ ﻓﻲ ﺩﺍﻣـــﻮﺳـﻪ