الموت حق

الموت حق ما لايم عليه اتسال ...
ولا يعنها ناهي بقولة هايا ....
ولا تفوتهم لجواد لا الأنذال ...
وتاخذ اللي ساهون والصلايه ...
نعزو اليوم وما يدوم الحال ..
بكره علينا يحضرو عزايا ...
هذا لونها ديما أوقات دلال ...
واوقات عالزها تقصر وعالتغفايا ..
الدنيا قديمه حالها حوّال ...
وبيهن مخافيها دري مولايا ...
يعينا الله بصبر وإبتهال ..
ويجعل أموات المسلمين هنايا ...
ويجيرنا الله من البِدع والضلال ...
ويجعل اخطانا في ادروب اهدايه ...
...
الشاعر مراد السنيني مدينة طبرق