مع كم شخص بتتواجه في #القنطرة ؟

مع كم شخص بتتواجه في #القنطرة ؟
وهل أنت الفرحان ولا الخايف ؟

القنطرة، هي مكان بعد الصراط وقبل الجنة، مكان #يقتص فيه المظلوم من الظالم، وكل ضعيف مسكين، من قوي جبّار.

في المكان هذك، حتواجه #الجميع، مع اللي زعلك زعلة بسيطة، و للي أذاك وظلمك ظلم عظيم.

مش بس اللي سرقك، واللي نصب عليك، ولا شوه سمعتك.
حتى هذك الشخص اللي سبك في سيارته وعدا في حاله، حتلقاه بعد الصراط !

ومش بس اللي قرماتك، ولا اللي نمت عليك، ولا خربت عليك حياتك ولا خطوبتك، حتى هذك اللي تعمدت تأذيك ب تعليق شين، وكسرت قلبك، حتلقيها بعد الصراط !

#الله، عليك مكان سمح، وحينجبرن فيه الخواطر، وياخذ كل حد فينا حقه اللي ضاع في دنيا البشر اللي مافيهاش عدل.

بس في حاجة تخوف !
مش أنت/ أنتِ بس اللي حتقتصوا من الناس، مرات في ناس ترجى فيكم !! وتبي تاخذ حقها منكم !!

المخيف في الأمر، في القنطرة مافيش وسيلة ترد بيها الحق، إلا أنك تدفع أغلى ما عندك!

#حسناتك !

يعني أنت اللحظة هذي طالع من الحساب مع الله عزّ وجل، والله غفر لك، ومشيت على الصراط اللي تحته جهنم !
ومع هذا فتت الصراط والحمد لله وتبي تخش للجنة خلاص، شبه مافي بينك وبين النعيم الأبدي شيء.

بس للأسف تلقى العشرات ولا المئات ولا الألاف، قاعدين يرجوا فيك في القنطرة، وتعطي هذا من حسناتك، وهذك من حسناتك لدرجة مرات حسناتك تكمل !! بعدها تحساب الموضوع كمل ؟ لا!

المظلوم حيقعد يعطي فيك من سيئاته حق ظلمك له في الدنيا، وتقعد تشيل من هذا، ومن هذا، لعند آخر شخص أذيته في حياتك كلها.

كارثة !! حتعطي الكل من حسناتك، أو تأخذ سيئاتهم!!

البوست مش تخويف، بالعكس، لو أنت مظلوم، يافرحتك وياسعادتك، حتاخذ حقك منهم واحد واحد.
ولو أنت ظالم، مازال عندك فرصة ترد للناس حقها وتعتذر منهم عشان تنجو من الحسرة في القنطرة يوم القيامة.