يحكوا على رجل

يحكوا على رجل توفى وعند 3 أولاد . وبعد حز العزي
جوا أولاده يشوفوا شن معقبلهم بوهم .
المهم إلقوه معقبلهم 3 صناديق زي بعضهن وكل صندوق مكتوب عليه اسم واحد من الأولاد .
كل واحد خدي صندوقه وفتحه
الولد الصغير إلقاه معبي ذهب
الولد الوسطي إلقاه معبي عظام
والولد الكبير إلقاه معبي تراب
قالوا لابدا نقسموا الصناديق الثلاثة بالتساوي لأنه احني خوت ولازم نكونوا متساويين . صاحب الذهب ما عجباش الكلام .
قالوله خوته في شيخ مشهودله بالمعرفة والدبارة وحكيم في حل المشاكل والأمور اللي زي هدي . خلي نمشوله يشوفلنا حل .
عزموا عالسفر واسقدوا . وهما ماشيين قابلتهم فرس حمرا حجلة غرة ما تمنى تواطي منها عيونك قعدوا يبرقوا فيها و وين فاتوها عقبت وراهم وين التفتوا لاونهم شافوها موحشة من القفا كفلها رقيق وذيلها قصير وشين .استغربوا وكملوا طريقهم .
قابلتهم هامة (لفعة كبيرة) طالعة من فم قطرة ( حفرة) قعدوا يحذفوا فيها بالرشاد يبوها تخش في قطرتها . حذفوا حذفوا لين دهشوا ولكنها ثابته في مكانها ما تحركتش .
كملوا طريقهم لاقاهم جمل في وطن جذب مافيش احذاه لا عشب لا حطب بيش ياكل . لكن هذاك الجمل سمين داير دروة كبيرة وداير وبر ومنظره سمح . استغربوا فيه وكملوا طريقهم .
خشوا وطن ربيع عشب خابل وشجر اخضر . إلقوا فيه هذاك الجمل ضعيف باطل ضلوعه باينات . تعجبوا منه بس طبعا ما عرفوش يفسروا .
قالوا احني غير نوصلوا للشيخ الحكيم ونحكوله شن قابلنا في سفرنا وهوا يفسرلنا .
وين وصلوا لبيت الشيخ إلقوه مهناكش وقابلتهم بنته
قالولها وين بوك / قالتلهم ماشي يندم
قالولها وين أمك / قالتلهم ماشية تعاصي في ربي
قالولها وين خوك / قالتلهم ماشي يطلق في الظالم على المظلوم .
قالتلهم انتم ليش تنشدوا تفضلوا شن تبوا .
قالولها احني عندنا مشكلة بونا مات وعقبلنا 3 صناديق كل واحد عليه اسمه . وفتحناهن واحد فيه ذهب وواحد فيه عظام وواحد فيه تراب .
قالتلهم معناها بوكم معقب ذهب وبل وغلم ووطا
صاحب صندوق الذهب ياخد الذهب بس وما معاه شي ثاني
وصاحب صندوق العظام ياخد البل والغلم
وصاحب صندوق التراب ياخد الوطا
المهم فرحوا بالتفسير . وقالولها في سفرنا قابلتنا شوية حاجات غريبة .
الفرس اللي لاقتنا من قدام سمحة ووين عقبت ورانا شينة موحشة / قالتلهم هادي الدنيا كان عطاتك بالوجه مافيش اسمح منها وكان عطاتك بالقفا مافيش اوحش منها .
قالولها باهي والهامة اللي على قد ما حذفناها ما بتش تخش لقطرتها / قالتلهم هادي كلمة السو كان قلتها معاش تقدر تردها .
والجمل السمين في وطن الجذب / قالتلهم هذا البنادم اللي يخدم بذراعه وعرقه برزق حلال ويأكل في رزقه وباين عليه .
والجمل الباطل في الربيع / قالتلهم هذا اللي حارم نفسه و بخيل و يجمع في ثروته من الحلال والحرام وما يصرفش على روحه ما يحصلش غير الشقا في الدنيا والحساب في الآخرة .
قالولها باهي والكلمات اللي قلتيهن لما نشدناك على بوك قلتي ماشي يندم / قالتلهم ماشي يحرث . يعني اللي يحرث ضروري يندم كان جي صابة يقول يا ريتني حرثت واجد بيش حصلت شعير واجد وكان ما جاش صابة يقول يا ريتني ما حرثت بيش ما خسرتش حق الزريعة وحق الحرث .
قالولها وأمك اللي قلتي ماشية تعاصي في ربي / قالتلهم البعيد ماشية تنوح في عزي والنواح منهي عليه .
وخوك اللي قلتي ماشي يطلق في الظالم على المظلوم / قالتلهم ماشي يصيد يطلق في السلوقي على الأرنب ويطلق في الصقر على الحبارة .
-------------------------------
الحكمة من الخرافة
الدنيا تبي خبير .. والبحر يبى قوارب .. والحلم عنده تفاسير .. والسيل عنده مسارب .. وأوقات تسعد تحير .. و أوقات مرتاح طارب .. والصبر مفتاح خير .. وابنادم حياته تجارب.