ومرات....

مرات نطرب و المدامع سايله ،
و مرات يوم الفرح نبكي فيه .
و مرات أثقل ثقل نقعد شايله ،
و مرات حمل الريش نغلب فيه .
و مرات نحمل في حمول الزايله ،
و مرات حتى الجرد نغلب فيه .
و مرات نسقي و الجوابي فاضيه ،
و مرات نعطش و الميه فيه .
و مرات نقرب و الموانع حايله ،
و مرات نبعد رغم شوقي ليه .
و مرات نذهب في خيار القايله ،
و مرات حتى الليل نخبر فيه .
و مرات عقلي ما أهناك مثايله ،
و مرات حتى شبر نغرق فيه .
و مرات نردع في الجمال الضايله ،
و مرات جدي الريم نوحل فيه .
و مرات شيخ و باهيات فعايله ،
و مرات تنظرني أتقول سفيه .
و مرات نذكر عهد مده طايله ،
و مرات حتى عشاي ننسى فيه .
و مرات تعجبني البعيد فعايله ،
و مرات حتى خوي نكره فيه .