نوصيك يابنتي ❤

نوصيك يابنتي
الحوش بلا كبير زي الجنان بلا بير . أمنتك تصوني كبار العيلة .

عدوك تقتليه بالسكات ..
واصبري على طبق الجمر . لين يجيك طبق التمر

زيني فالك كل صبح وعشية .وكلمة السو من مولا بيتك .. أنسيها ، وكلمة الحق قوليها ماتخافي وتدسيها
وكان شوفتي عيبة في ناسه استريها ، وحاجة السر مع زوجك في البير طيحيها 🤍.

و الفم المسكر مايخشله ذبان . قللي كلامك ودسي اللسان
ومش عيب ع الي تخش الفم .. العيبة فاللي يطلع منه
والحرة كلامها ينحط على الجرح يبرا .ⷶ
ويذوب ...
وتفرح بيه القلوب ..
والعبيها عمية .طرشة .ماتجيبلك معرة 🤍.
واضحكي بحنانة..
ونيتك زينيها وماكلتك ذوقيها.
والي ينصحك بالسر اسمعيله. والكبير لاتقاطعيله كلام
وخلي حاجة الضيف ديما مدسوسة.. والحاجة النازكة ديما ملبوسة .
وديما اغسلي وجهك ماتعرفي مين يلاقيك .
ونضفي حوشك ماتعرفي من يجيك.
الحوش يشدوه الاوتاد.. والمرا مايشدها غير لولاد.. وولدك على القرآن والدين ربيه ..وما تخلي مولا بيتك يركب راسه .ويغير ساسه. ما تقوى مكانته .. ويكبر غير بأصله وناسه 🤍