صديقي حكالي

واحد صاحبي يحكيلي امس
قالي من امتى وجيت عالدنيا وامي حامل
ديما حامل
يا ترضع يا حامل
لحد ما درت شنابات وامي تجيب في الصغار
خشيت الجامعة وامي تجيب في الصغار
تخرجت وامي تجيب في الصغار
المشكلة لما ترقد دايرين بيها بناويتها من كل الاتجاهات ماعرفتش امتى تتلاقى هيا وبوي..
هوا حوشنا دارين ومربوعة
كل دار راقدين فيها اربعة
والمربوعة فيها اني وخوتي الاولاد
ومع هذا الخانب يغلب العساس..
وبوي راجل موظف مستواه خمسة وعشرين اعدادي ديما مبتسم وباله واسع وواخد الحياة ببساطة
يروح من خدمته يتغدى ويضربها نويمة للعصر وبعدين يطلع يطلفح من مرشبيدي لمرشبيدي وخلاص..
وصلو خوتي اربعطاش ولا يزال الانتاج مستمر
قريب نشد بوي ونلصقه عالحيط نقوله خلاص ياحاج..تربح ياحاج..ارزن ياحاج. فكنا ياحاج شن في!؟
مرة امي جابت زوز تواما بوي قعد يومين يبكي من الفرح
يحساب روحه دار انجاز
يحساب روحه اكتشف زوز كواكب جديدة في المجموعة الشمسية.

المهم...
لقيت روحي كبير العيلة وعندي تمانية خوات بنات وستة ولاد
وبدل ما نلهى في مستقبلي قعدت حاصل في خواتي وخوتي
ارفع هادي للثانوي ورد هادي للجامعة واشري لهادي كندرة واسحب لهادي شيتات
وبوي مستمخ ومزاجه جميل ما يندري عليها منين زارقة والمقولة الخالدة الي يردد فيها كل يوم (العبي على ربي وعليك يا ولدي وخواتك امانة في رقبتك..)
فاتحلي معمل تفريخ وعابي عليا .؟؟
تحسابني وزارة الشئون الاجتماعية عابي عليا..؟؟
توا بالله كيف نتفاهم معاه..!!!

مرتب بوي محدود ولقيت روحي من الثانوي نخدم باش نساعده في المصروف
فرشت بالقفاطين والكنادر
نظفت الحوت وبعت السردينة
شريت تاكسي بالتقسيط وخدمت عليها
اجرت محل وبعت الدجاج واللحم وطبعا خوتي الاولاد خدمتهم معاي تقولش ولادي.

وبوي زعميتك مفتخر بيا وكل ما يشوفني خشيت مشروع جديد يفرح ويمشي يجري يجيب عيل جديد..

بعدها خواتي كبرو وجوهم الخطاب
كل وحدة تتجوز تبي حفلة وصالة وجهاز وبوي ولا على باله..

نقعمز اني وامي وخواتي نخططو للعرس يخش علينا ويوقف مبتسم بفخر وسعادة ويتسقد للمرشبيدي واثق الخطوة يمشي ملكا..
خواتي الزوز الكبار تزوجو وجابو صغار وامي قاعدة تجيب..

لكن سبحان الله..

من اول ماعرفت الدنيا عمره القرش ما نقطع من جيبي
ديما عندي فلوس وديما فيه فائض وحتى نتسلف ونضطر نخش في الدين لما نجوز خواتي بعدها بشهور بسيطة نخلص ديني..

وحتى اني تجوزت ودرت صغار
صح تجوزت كبير لكن الحمدلله مافاتني شي.
جبت زوز بنات وستوب خلاص
نعمة من ربي وسادني زوز بنيات

المهم .. امه امس جابت عيل 🤣