🙂

امواجع ايجن ملي عليه انحاحي
ايفوتن ونا مازلت في مطراحي.

ايجن بزيادة
ويجن في سرايا تغلب العدادة

ونا نضل نرخيله وهو ايتمادة
ويحسابني ماني عليهن صاحي

ونشيل ع الدبر مرات فوق العادة
وينبل من شبح البعيد جناحي

ومرات نصرف ابدون ايرادة
ونثور نين ناخذ دقرتي ووشاحي

وتخطر اعيون اجواد كانوا سادة
نبرد انسكر ع العلل مفتاحي.

لا انتهبع
ولاني اللي حذف الرشاد انتبع

ونضحك علي وحدين عاشو تبع
اللي عندهم عدوت الخوت ايباحي

ادماغه ابفكر المارقين اشبع
صاحي وهو صاحي وماهو صاحي

اللي ماحسب ليام وين اتربع
انصاف وسط ينحرقن امعاه ضواحي

ايجني صربه
امواجع وما ملي اتجي نستربا

اتقول غير قاعد في ابلاد الغربه
في وسط ناس امحاربين نجاحي

وسليمت الجناح انلايمت ع الجربه
ماني لها باب السلامه واحي

وانتعب خصيمي لو نويت الخربه
وحطيت صبعي فوق صبع اسلاحي

ونصيف اعروق اللي نبت فالتربه
حتى وماها مالوطى نظاحي

ومحدد خطاويه أبراس الحربه
ما قدر نشحت من اوحود اقباحي

ولامن خصيم الزور عندي كربه
ويريضن معا قو العجاج اجباحي

ماهزني
ولا من طريقي ع اليسار رمني

كبير في اعيون اللي اكبار انظني
ونقول للعيون أللي اصغار ارتاحي

والعرف ماني واخذه ابتبني
علي ما يحاول مافلح ذباحي

ولا جن عدواني حكم في جني
ولا انطيح للي ناويين اطياحي

وديما علي اخطار السيول انوني
حتى سيل جوره مايقل اسناحي

ماي شكيره
النفسي انقلت اللي نبيه انديره

بكوني شريف وننتمي العشيرة
والتاريخ ذاكر فالجهاد املاحي

وقاعده قداي المشوره والشيره
واضحات ماعمره اشقي براحي

وكي انصادقك عندي نضاف سريرة
ما دم يخلط في نظاف اقداحي

وانريت الخلاف انوض نوضت عيرة
ويطولن اللي طرف بعيد ارماحي.