شيبانى ماشى لدكتورة عيون

بعد شفت الصورة خطرت علي هالدكتورة
.
.
.
خش قال السلام عليكم
الممرضه قالتله وعليكم السلام
تفضل قعمز ياحاج قعمز قدام الدكتوره
قالتله لاباس ياحاج من شن تشكي
الشيباني قاللها نحس في عيوني
مدغدشات ومش زي قبل وياكلن فيا
الدكتوره قالتله تعال عالجهاز خلي نشوفهم
ناض الشيباني قعمز وحط وجهه عالجهاز
الدكتوره قالتله اشبح قدامك طول ياحاج
الشيباني عجباته الدكتوره وقعد يشبحلها علي جنب ، الدكتوره أشرتله بيدها قالتله شوف القدام ياعمي.
الشيبناني ماعجباتاش كلمة عمي رد عليها قاللها..
.
.

يابنت نآآ ولله ماني عمك..
ياللي كما مذبح غزاله فمك..
يابنت يامزيونه..
خدك كمآ الورده ايقابل لونه..
وفيهن دواير كيف وجه فلونه..
ومن ربنا انتي اخفيف دمك..
ومن عند ربي بالعسل معجونه..
بيضه شكعتي كي رفعتي كمك..
وباين عليك مش واكله المكرونه..
زولك امرادع ساهلة في ضمك..
مش كي عزوزي الي كما الطابونه..
ولو تقربك حتى النفس اتغمك..
والكبد منها طاااايبه ومسحونه..
ماهيش كيفك ياوريدة امك..
انتي قنينه وباااين عليك حنونه..
وفي الكون مايقدرش حد ايذمك..
واللي ايشوفك طوول تبرى عيونه..
ويسكر بعطرك لو اقرب و شمك..
لو تقبلي حووشي انغير لوونه..
وبشرع ربي والأقسام انلمك.
.
.
.
وناض الشيباني من علي جهاز الكشف
وقف وقعد يشبح فيها ، والدكتوره تحشمت وقفت وراسها في الأرض و قالتله..
.
.
.
متجوزه ياحاااج نا بصغااري..
وخاطي لزوجي ما اتحق انظاري..
متجوزه ومرتاحه..
وانحب زوجي نآ بكل صراحه..
و مانساعداش يعيش غير جواري
ونا عايشه في عز تحت جناااحه..
ولا يوم عن طوعه يحيد مساري..
قلبي عطيته لراااجلي مفتااااحه..
وهو عاد غاااليااا امعلي اقداااري..
مااحد يقدر ياااخده مطرااااحه..
هاللي لصلاته اينوض من لفجاري..
ويبدآ عليااا كل يوووم صباااحه..
وايجيبلي لحد السرير افطآآآري..
ومعاي ديمآآآآ كاتراات افراااحه..
بوعين سمحه كيف صقر ابحاري..
وفي دار نووومي دارلي درجاحه..
ولله لووو نطلب ايجيب جوااري..
وديمآآآ نسوومه رايعه فوااحه..
خاااطيه مااااننظر وحق البااااري.
.
.
.
و الشيباني
وبعد سمع مايقهره دار طاقيته علي جنب
وقاللها..
.
.
.
بنجيبلك مرتي عطيها دووره..
في الحب والتدليع يادكتووره..
بنجيبلك فتحيه..
اللي رايحه م السمن كي البتيه..
عطيها نصيحه للرشاقه شويه..
وديريلها ريجيم ياسنفوووره..
واحكيلها كيف الغلا والغيه..
خلها النكد اتفوت هالمقهوره..
هي دوم راهي امطرمه ونكديه..
لازين قااالب لا سماحة صوره..
منها تردت حااالتي النفسيه..
ماافيش مره شفتها مسروره..
ماتشبهك ياللي كما الهنديه..
تفاصيل جسمك رايعه ومحدوره..
ونقشك رقيق الحق مش عاديه..
وبيضه كما الجبنه اللي معصوره..
ياسعد زوجك بيك ياحووريه..
يا ام العيون املونه مقرووره.
.
.
.
الدكتوره إلتبست وجهها راح زي
حبة الفراوله ردت عالشيباني قالتله..
.
.
.
عادي مراتك جيبها انعلمها..
كي تسعدك ياحاج وانسقمها..
جيبها انوريها..
ودروس في اصل الغلا نعطيها..
وصفة رجيم الحاجه نعطيها..
ونآ عالدهوون الحاجه انصيمها..
وكيف الغزااله جسمها انخليها..
لكن نبيك فحوشكم تدعمها..
وماعاد تهزآآ ياحويج عليهاا..
راهي الهزوه هي اللي تعدمها..
وتفرح مرااتك بإهتمامك بيهاا..
غير جيبها وروحي لها نقسمها..
وفي كل حاجه اتحبها انقريها..
ونآ نووعدك من شي مانحرمها.