يامن يخلص الصوف من الصوف

بكت خالتي صبرية مع خالتي لطيفة لين طاب ما في خاطرها!!!! قالتلها الله يرحمها كبيدتي ارتاحت لكن هالصغيويرة منو بيهم!!!؟ قالتلها خالتي لطيفة وهذا اللي توا بنكلمك عليه !!! قالتلها خير ان شاءلله ، قالتلها نبي خدوجة ل ابراهيم !!! سكتت خالتي صبرية مشوار وقالت خير مش فاطمة هيا الكبيرة !!! قالتلها نبي خدوجة بالها واسع وتتحمل !!! ويا صبرية كانك تحبي الخير ل هالصغيويرية قولي باهي !!! قالتلها صبرية !!!القول قول بوها !!! توا انت يا لطيفة احبيبتي وجارتي والله كان جت ليا اني نبي لبنيتي عزري !!! قالتلها خالتي لطيفة يا صبرية ابراهيم ينشرى بالمال !!! راجل حلايلي اعنيده الرزق ويحب لمرته الدلال !!! وانت شن تودي لبيتك غير راجل ولد حلال ايعيشها في خير ودلال !!! وزيدي عليها باب اجر تكسبه خدوجة في هالصغيويرة !!! والله يكبروا وتلقاهم مع صغيويرتها زي الفرح والسعد !!! قالت خالتي صبرية اللي فيها الخيرة يأتي بيها الله ، روحت خالتي صبرية ومن لما خشت وبناويتها ينشدوا فيها على الصغيويرة شن امدايرين بعد امهم !!! قالتلهم وهيا تشوف لخدوجة !!!! فجيوة فيهم كبيدتي !!!! المولى يرزقهم ببنية حلال تكون ام ليهم بعد اميمتهم الله يرحمها !!! قالولها ووووه بوهم بيتزوز ؟؟ قالتلها امها ايه امالا منو بيهم امساكين ؟؟؟ قالت فطومة يارب يحصلوا مرت بو طيبة مش زي مرت بو الطوير الاخضر المسمومة !!! قالتلها خدوجة عودي احكيهالي يا فطومة انسيتها كيف !!! قالتلها اتعالي معاي للكوجينة عاونيني ونحكيهالك !!! وفي الكوجينة ابدت فطومة تحكي لخدوجة في خرافة الطوير الاخضر !!! قالتلها هذا ياحنة ويا منة كان في راجل عنده اوليد وبنية صغيرين مش كبار هلبة !!! مرضت اميمتهم فجاة بمرض خطير وماتت !!! قال بوهم منو بيا اني وصغيويرتي ! من غير نتزوز مرا تانية وخلاص !! امشي تزوز مرا مسمومة وشريرة وهو غافل عليها !!! قدامه اتطفطف وتحن ولما يطلع لخدمته تطيح ضرب فيهم وتقولهم كان تعاودوا لبوكم نقتلكم !!! وبري على هالحال والبو غافل على فعايل مرته !!! لين انهار من نهارات عزم راجلها صحابه عالغدي وجاب اللحم طازة !!! حطت الغدي عالنار ولما اللحم وجه لطياب ابدت كل مرة تحرك وتطلع لحمة تاكلها لين ضربت عالطنجرة القتها فاضية واللحم كله بات في بطنها !!! قالت انهاري احرش شن بنعطي للراجل !!!! ما لقتش قدامها دبارة غير تاخذ لوليد تذبحه وتطيبه !!! توا اوخيته تشوف بدرقة وخايفة من مرت بوها !!! جي راجلها هو وضيوفه وتغدوا !!! وخدت البنية غسلت لمعينات وجمعت اعظيمات اوخييها ودفنتهم تحت الشجرة !!! تاني يوم صبحت الدنيا وصبح طوير اخضر فوق الشجرة يغني ويقول !!! اني الطوير الاخضر ***مرت بوي دبحتني ***وبوي اكلي من لحمي ***واختي العزيزة عليا اخدت اعظيمات ودفنتهم تحت الليمة المسكية !!! سمع البو غني الطوير وفهم اللي صار !!! رفع مرته لاماليها بعد ما طلقها وحكالهم شن صار وقاللهم بنتكم عندكم وديروا حكمكم !!! شهقت خدوجة وقالت هالمسمومة المفروض يقتلوها !!! ضحكت فطومة وقالت !!! تخيلي روحك مرت السي ابراهيم !!! شن اديري لصغاره ؟؟ قالت خدوجة وك عليا والله مانديرهم الا صغاري وما نودلهم كان الخير !!! قالتلها فطومة وهيا تضحك اتخيلي يصير حق !!! تسمع فيهم امهم في وسط الحوش وهيا تقول في خاطرها هو حق !!! ربي يقويك يا بنيتي ويعطيك العزم ووسعة البال وتكسبي اجر هالصغار !!! روح السي مختار وبعد ما تعشى جابتله خالتي صبرية سيرة السي ابراهيم وصغاره !!! قاللها والله هالراجل يستاهل كل خير !!! الدنيا كلها تبيه !!! قالوا حتى من معتوق عرض عليه يناسبه لكن ابراهيم ما عطاشي رد !! وهوينا معتوق يهبل كان يسمع بيه اخدي من حد تاني !!! قالتله صبرية وهيا تضحك !!! امالا تو يهبل حق ، ما سد بياخذ من حد تاني وماسد الحد التاني هو انت ......