لا زعلت منك لاهناك ملام.

لا زعلت منك لاهناك ملام.
في خاطري لاشلتها في بالي
ولاني علي سبله ان صار كلام
كلام جاى من غالي عزيز لغالي
خوذ راحتك كل الامور تمام
مازال لك نفس المقام العالي
رفيق لك مكان وقدر واحتِرام
وليك المودة كيف قبل وتالي
ماني من اللي فالرفق لوام
وسيع بال رابط فالوثاق احبالي
ان كاني زعلت انجيك من قدام
نقولك اني زعلان عقلي مالي
اللي قالك جا للرفق هدام
بفتنة نوا يفتن رفيق هلالي
نحنا رفقنا عمر ماهو عام
انت جلوتي وين مايضيق مجالي
وانت فزعتي وين مانجي منضام
وقات العنا نرمي عليك احمالي
حوذ واكدة ياصاحبي تعلام
نرتاح وين ماشورك نسوق جمالي